කාලගුණ ආපදාවෙන් දුම්රිය මාර්ග විනාශවීම හේතුවෙන් තවමත් දුම්රිය ධාවනය කෙරෙන්නේ මාර්ග පද්ධතියෙන් තුනෙන් එකක ප්රමාණයක පමණ බව ප්රවාහන නියෝජ්ය අමාත්ය වෛද්ය ප්රසන්න ගුණසේන මහතා පාර්ලිමේන්තුවේදී අද ප්රකාශ කළා.
ඔහු මේ බව කියා සිටියේ කාලගුණ ආපදාව පිළිබඳ සභාව කල්තබන අවස්ථාවේ විවාදයේදීයි.
"හානි හේතුවෙන් දුම්රිය මාර්ග පද්ධතියෙන් තුනෙන් එකක තමයි දුම්රිය ධාවනය කිරීමට හැකි වෙලා තියෙන්නේ. දුම්රිය මාර්ගවලට ගල් පෙරළීම් 91ක් වාර්තා වෙනවා. දුම්රිය මාර්ගවල පාදම කඩාගෙන යෑම් 73ක් වාර්තා වුණා. බෝක්කු සහ පාලම් තිස් අටක් සම්පූර්ණයෙන්ම විනාශ වුණා. ගස් කඩා වැටීම් එක එකසිය හතළිස් නවයක් වාර්තා වුණා. සුළු වශයෙන් පාදම විනාශ වූ ස්ථාන 177ක් තියෙනවා." යනුවෙන් නියෝජ්ය අමාත්යවරයා එහිදී සඳහන් කළා.
"දුම්රිය ස්ථානවල හානි 27ක් වාර්තා වෙනවා. බලන- කඩුගන්නාව ප්රධාන කොටස ප්රධාන වශයෙන් හානි වෙලා තියෙනවා. උඩ රේල් පාර විතරයි ඉතිරිවෙල තියෙන්නේ. ගම්පොළ නාවලපිටිය දුම්රිය මාර්ගයත් වත්තේගම උකුවෙල මාර්ගයත් ඒ විදිහටමයි. කොටගල අඹේවෙල කෑල්ලත් ඒ ආකාරයටම විනාශ වෙලා. ඒ මාර්ග කොටස් වැඩි වියදමක් දරලා හදන්න වෙලා තියෙනවා."
