පළාත් පාලන ඡන්ද විමසීම පැවැත්වෙන දිනය තීරණය කිරීම සඳහා මැතිවරණ කොමිෂන් සභාව ලබන අඟහරුවාදා යළි රැස්වෙනවා. එම කොමිසමේ උසස් නිලධාරියෙකු සඳහන් කළේ, එදිනට කොමිසම හමුවට පැමිණෙන ලෙස දන්වමින් මුදල් අමාත්‍යාංශ ලේකම්වරයා, රජයේ මුද්‍රණාලයාධිපතිනිය සහ පොලිස්පති ඇතුළු පාර්ශව කිහිපයකට අද දිනයේදී ලිපි යොමු කරන බවයි.

මේ මස 09 වනදා පළාත් පාලන ඡන්දය පැවැත්වීමට තීරණය කර තිබුණත්, පසුගියදා මැතිවරණ කොමිෂන් සභාව නිවේදනය කළේ එදිනට ඡන්දය පැවැත්වීමට හැකියාවක් නොමැති බවයි. ඒ අනුව ඊයේ රැස්වී ඡන්ද දිනය තීරණය කරන බවයි මැතිවරණ කොමිෂන් සභාව මීට පෙර සඳහන් කළේ.

කෙසේ වෙතත්, ඊයේ පෙරවරු 10.30 ට මැතිවරණ කොමිෂන් සභාව එහි සභාපති නීතිඥ නිමල් පුංචිහේවාගේ ප‍්‍රධානත්වයෙන් රැස්වුණා. ඡන්දය පැවැත්වීමට අවශ්‍ය මුදල් ප‍්‍රතිපාදන ලැබීම සහ ඡන්ද පත‍්‍රිකා මුද්‍රණය ඇතුළු කටයුතු සම්බන්ධයෙන්ද අවධානය යොමුකරමින් ඡන්ද දිනය සම්බන්ධයෙන් එහිදී දීර්ඝ වශයෙන් සාකච්ඡා කර තිබෙනවා.

කෙසේ වෙතත්, ශ්‍රේෂ්ඨාධිකරණය මුදල් අමාත්‍යංශ ලේකම්වරයාට හා නීතිපතිවරයාට නිකුත්කළ නියෝගයක් හේතුවෙන් පළාත් පාලන ඡන්ද දිනය තීරණය කිරීම කල්දැමූ බවයි මැතිවරණ කොමසාරිස් ජනරාල් සමන් ශ‍්‍රී රත්නායක නිවේදනයක් නිකුත් කරමින් සඳහන් කළේ.

පාර්ලිමේන්තුව මගින් සම්මත කර තිබෙන අයවැය තුළින් 2023 වසරේ මැතිවරණ කටයුතු සඳහා වෙන්කර තිබෙන මුදල් ප‍්‍රතිපාදන රඳවා ගැනීම වළක්වාලමින් ශ්‍රේෂ්ඨාධිකරණය විසින් මුදල් අමාත්‍යාංශයේ ලේකම්වරයාට ඊයේ මෙලෙස තහනම් නියෝගයක් නිකුත් කළා. ඒ, සමගි ජනබලවේගයේ මහලේකම් පාර්ලිමේන්තු මන්ත‍්‍රී රංජිත් මද්දුම බණ්ඩාර විසින් ඉදිරිපත් කළ මූලික අයිතිවාසිකම් පෙත්සමක් විභාගයට ගැනීමට අවසර ලබාදෙමින්.