රට නගන වැඩපිළිවෙලට එක්වන ලෙස ජනාධිපතිවරයා අයවැය ඉදිරිපත් කරමින් විපක්ෂයෙන් ඉල්ලා සිටියා. 

අයවැය කතාව අවසන් කරමින් ජනාධිපතිවරයා කියා සිටියේ රට නගන වැඩපිළිවෙලේදී එහි හවුල්කාරයින් වන ලෙසට විපක්ෂයට ආරාධනා කරන බවයි. 

2024 වර්ෂය සඳහා වන අයවැයෙන් පොහොර සහනාධාරය සඳහා රුපියල් මිලියන 19,500 ක් වෙන් කිරීමට පියවර ගැනුණා. 

ජනාධිපති රනිල් වික්‍රමසිංහ මහතා විසින් අයවැය ඉදිරිපත් කරමින් තවදුරටත් කියා සිටියේ දහම් පාසල් ගුරුවරුන් සඳහා සහන ලබාදීමට රුපියල් මිලියන 635 ක් අයවැයෙන් වෙන් කෙරෙන බවයි. 

නව ඉඩම් නීතියක් හඳුන්වාදෙන බවත්, නව නීති 60 ක් හඳුන්වාදීමටත් කටයුතු කරන බව අයවැය ඉදිරිපත් කරමින් මුදල් අමාත්‍යවරයා ලෙස ජනාධිපති රනිල් වික්‍රමසිංහ මහතා කියා සිටියා. 

රාජ්‍ය බැංකු දෙකේ කොටස්වලින් 20%ක් උපාය මාර්ගික අයෝජන සඳහා ලබාදීමට මෙවර අයවැය මගින් යෝජනා කෙරුණා.

2034 වසර වනවිට ඉංග්‍රීසි සාක්ෂරතාව සැමට ලබාදීමේ වැඩසටහනක් සඳහා රුපියල් මිලියන 500ක් වෙන් කිරීමට අයවැයෙන් යෝජනා කෙරුණා. 

එසේම, පාසල් සිසුන් සඳහා දැනට ක්‍රියාත්මක නොවන සුරක්ෂා රක්ෂණ ක්‍රමවේදය නැවත හඳුන්වාදීමටද අයවැය මගින් ජනාධිපතිවරයා යෝජනා කළා. 

රටේ අනාගත දියුණුව උදෙසා හොරකම් නොකරන ලෙස සියලු දෙනාගෙන් ඉල්ලා සිටින බව අයවැය කතාව ඉදිරිපත් කරමින් ජනාධිපති රනිල් වික්‍රමසිංහ මහතා ප්‍රකාශ කළා. 

එහිදී ජනාධිපතිවරයා සඳහන් කළේ රජයේ නාස්තිකාර වියදම් අවම කිරීමට කටයුතු කළ යුතු බවයි. 

පාඩු ලබන රාජ්‍ය ව්‍යවසායන්වල බර රටේ ජනතාව මත පැටවී ඇති බවද මෙහිදී ජනාධිපතිවරයා සිහිපත් කළා. 

රාජ්‍ය සේවක ජීවන වියදම් දීමනාව අප්‍රේල් සිට රුපියල් 10,000 කින් ඉහළ දමන බව මුදල් අමාත්‍යවරයා ලෙස ජනාධිපති රනිල් වික්‍රමසිංහ මහතා අයවැය ඉදිරිපත් කරමින් ප්‍රකාශ කළා. 

එසේම, විශ්‍රාමිකයින්ගේ වියදම් දීමනාව රුපියල් 2500 කින් ඉහළ දමන බව සඳහන් කළ ජනාධිපතිවරයා එයද අප්‍රේල් මාසයේ සිට ක්‍රියාත්මක වන බව කියා සිටියා. 

2024 වර්ෂය සඳහා අයවැය ලේඛනය මේ වනවිට ජනාධිපති රනිල් වික්‍රමසිංහ මහතා විසින් පාර්ලිමේන්තුවට ඉදිරිපත් කරනවා.

ජනාධිපති රනිල් වික්‍රමසිංහ මහතා මුදල් අමාත්‍යවරයා ලෙස මෙවර අයවැය ඉදිරිපත් කරන්නේ දෙවැනි වරටයි.

මෙවර ඉදිරිපත් කෙරෙන්නේ 78 වැනි අයවැය ලේඛණයයි.