අද (30) මධ්‍යම රාත්‍රියේ සිට ක්‍රියාත්මක වන පරිදි ඉන්ධන මිල සංශෝධනයක් සිදු කිරීමට නියමිතව තිබෙනවා.

මිල කමිටුවේ නිර්දේශ සඳහා අමාත්‍යංශයේ අනුමැතිය හිමි වූ පසුව එම මිල ගණන් තීරණය කිරීමට නියමිතයි.

අමෙරිකානු ඩොලරයට සාපේක්ෂව රුපියල් ශක්තිමත් වීම හේතුවෙන් ඉන්ධන මිල අඩු වනු ඇති බව බොහෝ පිරිස් විශ්වාස කරනවා.

කෙසේ වෙතත් මිල සළකා බැලීමේදී මිල කමිටුව රුපියලේ අගය ඉහළ යෑම සැළකිල්ලට ගන්නා නමුත් එය එකම නිර්ණායකය නොවන බව සඳහන්.

වෙළඳපොළේ සැබෑ ඉන්ධන මිල කෙරෙහි බලපාන සියලු සාධක මත මිල තීරණය කරන බවටයි අමාත්‍යංශයේ ප්‍රකාශකයෙකු කියා සිටියේ.

මේ අතර මහජනතාවට සහන ලබා දීමේ අරමුණින්, මිල සූත්‍රය වෙනස් කිරීමට කටයුතු කළ බවද පසුගියදා මාධ්‍ය වෙත අදහස් දක්වමින් විදුලිබල හා බලශක්ති රාජ්‍ය අමාත්‍ය ඩී.වී. චානක මහතා ප්‍රකාශ කළා.

ජනතාවට සහන සැලසීමෙන් අරමුණින් ලාභ සීමාව සියයට 4 සිට 1 දක්වා අඩු කළ බවයි ඔහු සඳහන් කළේ.

පසුගිය මස 31 වනදා සිට ක්‍රියාත්මක වන පරිදි ඉන්ධන මිල සංශෝධනය කෙරුණා. 

එහිදී ඔක්ටේන් 95 පෙට්‍රල් ලීටරයක් රුපියල් 07කින් අඩු කළ අතර එහි වත්මන් මිල රුපියල් 440ක් වනවා.

එමෙන්ම සුපිරි ඩීසල් ලීටරයක මිල රුපියල් 72කින් පහළ දැමුවා. එහි අනුව එහි මිල රුපියල් 386ක්.

එමෙන් ම භූමිතෙල් ලීටරයක් ද රුපියල් 12කින් අඩු කිරීමටයි කටයුතු කළේ.

කෙසේ වෙතත් මෙම මිල සංශෝධනය අනුව ඔක්ටේන් 92 පෙට්‍රල් සහ ඔටෝ ඩීසල් ලීටරයක මිල සං⁣ශෝධනය කෙරුණේ නැහැ. 

ඒ අනුව ඔක්ටේන් 92 පෙට්‍රල් ලීටරයක් රුපියල් 371කටත් සුදු ඩීසල් ලීටරයක් රුපියල් 363කටත් අලෙවි වනවා.

මේ අතර සිපෙට්කෝ මිලට සමාන වන අයුරින් LIOC සමාගම ද ඔවුන්ගේ මිල ගණන් මේ ආකාරයෙන්ම සංශෝධනය කළා.