මෙරට ප්‍රාග්ධන වෙළෙඳපොළ ඉතිහාසයේ ප්‍රථම වරට කොළඹ කොටස් වෙළෙඳපොළ සියලු කොටස් මිල දර්ශක අගය ඒකක 18,500 සීමාව අද දිනයේදී පසුකර ගියා. 

ඒ අනුව සියලු කොටස් මිල දර්ශකය ඒකක 379.77 ක වර්ධනයක් සනිටුහන් කරමින් දිනයේ ගනුදෙනු අවසානයේදී ඒකක 18,541.26 ක් ලෙස සටහන් වුණා.

බැංකු සමාගම් රැසකම කොටස් මිල ගණන් දිනය තුළදී කැපීපෙනෙන ලෙස ඉහළ ගොස් තිබෙන අතර එහිදී සම්පත්, HNB, කොමර්ෂල් සහ DFCC යන බැංකු සමාගම්වල කොටස් මිල ඉහළ යාම්, සියලු කොටස් මිල දර්ශකයේ වර්ධනයට ඉහළ දායකත්වයක් ලබාදී තිබුණා.

මීට අමතරව ජෝන් කීල්ස් හෝල්ඩිංග්ස් හි කොටස් මිල වර්ධනයද සියලු කොටස් මිල දර්ශකයේ මෙම වාර්තාගත ඉහළයාමට බෙහෙවින් දායක වූ බව වෙළෙඳපොල විශ්ලේෂකයන් පෙන්වා දෙනවා.

රු. බිලියන 10.22 ක දැවැන්ත පිරිවැටුමක් දිනය තුළ වාර්තා වී තිබුණා.

එහිදී පෑන්ඒෂියා බැංකුව (රු. බිලියන 1.2), ජෝන් කීල්ස් හෝල්ඩිංග්ස් (රු. මිලියන 593), හැටන් නැෂනල් බැංකුව (රු. මිලියන 533), හේලීස් ෆැබ්රික් (රු. මිලියන 320) සහ ඇක්සෙස් ඉංජිනියරින් (රු. මිලියන 287) යන සමාගම් අද දින පිරිවැටුමට ඉහළ දායකත්වයක් ලබාදීමට සමත් වුණා.