උතුරු සහ නැගෙනහිර පළාත්වල අද හර්තාල් ව්‍යාපාරයක් සිදුකරන බව ඉලංකෙයි තමිල් අරසු පක්ෂය පවසනවා.

මුලතිව් ඔඩ්ඩුසුඩාන් හමුදා කඳවුරට ඇතුළු වූ පුද්ගලයින් පිරිසකට හමුදා නිලධාරීන් විසින් පහරදුන් බවට චෝදනා එල්ල වූ අතර, එම කඳවුරට ඇතුළු වූ තවත් තරුණයෙකු ප්‍රදේශයේ වැවක මියගොස් සිටියදී සොයා ගැනීමත් සමඟ ඒ සම්බන්ධයෙන් හමුදාවට චෝදනා එල්ල වුණා.

අදාළ සිද්ධිය සම්බන්ධයෙන් විශේෂ පොලිස් කණ්ඩායම් 02ක් විමර්ශන සිදුකරන අතර ඒ සම්බන්ධයෙන් හමුදා සෙබලුන් තිදෙනෙකු අත්අඩංගුවට ගෙන රක්ෂිත බන්ධනාගාර ගත කර ඇති බව පොලිසිය සඳහන් කළා.

කෙසේ වෙතත්, අදාළ තරුණයා මියයාමට විරෝධය පළ කරමින් උතුරු සහ නැගෙනහිර පළාත්වල අද දිනයේ හර්තාල් ව්‍යාපාරයක් සිදුකිරීමට සැලසුම් කර ඇති බව පාර්ලිමේන්තු මන්ත්‍රී ශානක්‍යන් රාසමානිකම් මහතා ද පැවසුවා.

මෙම හර්තාල් ව්‍යාපාරයට ශ්‍රී ලංකා කම්කරු කොංග්‍රසය සහ ශ්‍රී ලංකා මුස්ලිම් කොංග්‍රසය ද සහය පළ කරනවා. 

කෙසේ වෙතත්, උතුරු සහ නැගෙනහිර පළාත්වල අද දිනයේ ක්‍රියාත්මක වන හර්තාල් ව්‍යාපාරය සම්බන්ධයෙන් ඊයේ පැවති මාධ්‍ය හමුවකට එක්වෙමින් නලින්ද ජයතිස්ස අමාත්‍යවරයා සඳහන් කළේ රජය හා ආරක්ෂක අංශ ඉලක්ක කර ගනිමින් සිදුකරන අදහස් විකෘති කිරීම් හා අසත්‍ය ප්‍රචාරවලට රැවටීමෙන් වළකින ලෙසයි.