ඔට්ටු ඇල්ලීමේ යෙදුමක් ප්‍රවර්ධනය කිරීම හරහා මුදල් විශුද්ධිකරණය කිරීමක් සම්බන්ධයෙන් චෝදනා එල්ල වී ඇති ඉන්දීය හිටපු ක්‍රිකට් ක්‍රීඩකයන් දෙපළක් වන සුරේෂ් රයිනා සහ ශිකර් ධවාන්ගේ රුපියල් කෝටි 11.14ක වත්කම් රාජසන්තක කර තිබෙනවා.
ඒ, මුදල් වංචා සම්බන්ධයෙන් සොයාබලන එරට විශේෂ ඒකකයක් (Enforcement Directorate) විසින්.
අදාළ විමර්ශනයට අනුව රයිනාගේ නමින් ඇති ඉන්දීය රුපියල් කෝටි 6.64 ක් පමණ වටිනා අන්‍යෝන්‍ය අරමුදල් ආයෝජන මෙන්ම ධවාන්ගේ නමින් ඇති රුපියල් කෝටි 4.5ක් වටිනා නිශ්චල දේපළක් මෙලෙස අත්පත් කරගෙන තිබෙනවා.
රයිනා හා ධවාන්ට අමතරව මෙම චෝදනාව සම්බන්ධයෙන් යුවරාජ් සිං හා රොබින් උතප්පාගෙන්ද ප්‍රකාශ සටහන් කරගෙන ඇතැයි සඳහන්.
එමෙන්ම, ජනප්‍රිය නළු සෝනු සූඩ්, හිටපු පාර්ලිමේන්තු මන්ත්‍රී මිමී චක්‍රබෝර්ති, බොලිවුඩ් නිළි උර්වෂි රවුටෙලා සහ බෙංගාලි නළු අංකුෂ් හස්රා යන අයගෙන්ද මේ පිළිබඳ ප්‍රකාශ සටහන් කරගෙන තිබෙනවා.
